പെരിയാറിൽ ചാടിയ എഴുത്തുകാരൻ തുളസിദാസിൻ്റെ മൃതദേഹം കണ്ടെത്തി; സാംസ്കാരിക കേരളത്തിന് തീരാനഷ്ടം..

കൊച്ചി: പെരിയാറിൽ ചാടി ആത്മഹത്യക്ക് ശ്രമിച്ച എഴുത്തുകാരനും പ്രസാധകനുമായ ശങ്കരപ്പണിക്കർ തുളസിദാസിൻ്റെ (59) മൃതദേഹം കണ്ടെത്തി. ചങ്ങനാശ്ശേരി ഇത്തിത്താനം സ്വദേശിയായ തുളസിദാസ് തൃശൂർ പൂത്തോളാണ് താമസിച്ചിരുന്നത്.

​‘ശപത്ഥ്’ എന്ന തൂലികാ നാമത്തിൽ അറിയപ്പെട്ടിരുന്ന അദ്ദേഹം, തൻ്റെ 30-ൽ പരം ദൈവിക രചനകളിലൂടെ വായനക്കാർക്കിടയിൽ ശ്രദ്ധ നേടിയിരുന്നു. എഴുത്തുകാരൻ, പ്രസാധകൻ, മീഡിയ അഡ്വർടൈസിംഗ് ഏജൻസി ഉടമ എന്നീ നിലകളിൽ പ്രവർത്തിച്ചു വരികയായിരുന്നു അദ്ദേഹം. ശങ്കരപ്പണിക്കർ തുളസിദാസ് എന്ന പേര് ചുരുക്കിയാണ് ‘ശപത്ഥ്’ എന്ന തൂലികാ നാമം സ്വീകരിച്ചത്.

​31 പുസ്തകങ്ങൾ ഒരുമിച്ച് പ്രസിദ്ധീകരിച്ചു

​11 നോവലുകൾ, 14 കഥാസമാഹാരങ്ങൾ, ഒരു നാടകം, 3 ആത്മഭാഷണ ശേഖരം എന്നിങ്ങനെ 31 പുസ്തകങ്ങളാണ് കഴിഞ്ഞ നവംബറിൽ ഇദ്ദേഹം സ്വന്തമായി ആരംഭിച്ച ‘ബാൺ ഔൾ ബുക്‌സ്’ എന്ന പ്രസാധക ഗ്രൂപ്പ് വഴി ഒരുമിച്ച് പ്രസിദ്ധീകരിച്ചത്. തൃശൂർ പുസ്തകോത്സവത്തിൽ സ്വന്തമായി സ്റ്റാളിട്ട് പുസ്തകങ്ങൾ വിറ്റഴിച്ചത് ഏറെ ശ്രദ്ധ നേടിയിരുന്നു.

​പ്രധാന കൃതികൾ:

​ഡാഡ് ഈസ് ഗോഡ്…
​ചുമരും ചിത്രവും തിരിച്ചെടുക്കുന്ന ദൈവം….
​വൻ മതിലിനുള്ളിൽ ദൈവം ശാപം വിതയ്ക്കുമ്പോൾ….
​ദൈവത്തിന്റെ സ്‌കൂൾ
​ദൈവം സ്‌നേഹമുള്ള കൊലയാളി…
​ദൈവത്തിന്റെ തപാൽപ്പെട്ടി….
​കടൽദൈവത്തിന്റെ കണ്ണ്….

​അംഗീകാരമില്ലായ്മയുടെ പരിഭവം

​ഒരു ഗോഡ്ഫാദറിൻ്റെ പിന്തുണയോ, പ്രത്യേക ഗ്രൂപ്പിൻ്റെ ഭാഗമാവുകയോ ചെയ്യാതെ ഒറ്റയാൾ പോരാളിയായി സാഹിത്യരംഗത്ത് പ്രവർത്തിച്ച എഴുത്തുകാരനായിരുന്നു തുളസിദാസ്. സാംസ്കാരിക കേരളം തനിക്ക് അർഹിക്കുന്ന അംഗീകാരം നൽകിയില്ല എന്ന പരിഭവം അദ്ദേഹത്തിനുണ്ടായിരുന്നുവെന്നും സുഹൃത്തുക്കൾ പറയുന്നു. പല ലൈബ്രറികളും തൃശൂർ പുസ്തകോത്സവത്തിന് ശേഷമാണ് ഇദ്ദേഹത്തെ അറിയുന്നത്.

​വ്യക്തിവിവരം

​1966 മേയ് 28-നാണ് തുളസിദാസ് ജനിച്ചത്. ഇത്തിത്താനം ലിസ്യൂ കാർമ്മൽ സ്‌കൂൾ, മലകുന്നം ഇളംകാവ് ദേവസ്വം സ്‌കൂൾ, ചങ്ങനാശ്ശേരി എസ്.ബി കോളേജ് എന്നിവിടങ്ങളിലായിരുന്നു വിദ്യാഭ്യാസം. സസ്യശാസ്ത്രത്തിൽ ബിരുദം നേടി. പിതാവ്: പി.പി. ശങ്കരപ്പണിക്കർ. അമ്മ: പി.വി. പത്മിനിഅമ്മ. ഭാര്യ: അജിത. മക്കൾ: ശിശിർദാസ്, ശിവാനി ദാസ്.

​എഴുത്തിൻ്റെ വഴിയിൽ സ്വന്തമായ ഒരിടം കണ്ടെത്തിയ ഈ പ്രതിഭയുടെ അപ്രതീക്ഷിത വിയോഗം സാംസ്കാരിക കേരളത്തിന് ഒരു തീരാനഷ്ടമാണ്.