ഡോക്ടറുടെ നിർദ്ദേശമില്ലാതെ കഴിക്കുന്ന വേദന സംഹാരി മരുന്നുകൾ നമ്മുടെ ആന്തരിക അവയവങ്ങളെ നിശബ്ദമായി തകർക്കുന്ന ‘മിസൈലുകളാണ്.
പനി വരുമ്പോൾ ശരീരം വേദന അറിയിക്കുന്നത് എങ്ങനെ?
ശരീരത്തിൽ അണുബാധയുണ്ടാകുമ്പോൾ (ബാക്ടീരിയയോ വൈറസോ പ്രവേശിക്കുമ്പോൾ), നമ്മുടെ പ്രതിരോധ സംവിധാനം പ്രോസ്റ്റാഗ്ലാൻഡിൻ (Prostaglandins) എന്ന രാസവസ്തുക്കൾ ഉത്പാദിപ്പിക്കുന്നു. ഈ രാസവസ്തുക്കളാണ് വേദനയുടെ ‘ദൂതന്മാർ’.
സന്ധികളിലും പേശികളിലുമുള്ള വേദന സ്വീകാരികൾ ഉത്തേജിക്കപ്പെടുകയും, ഈ രാസവസ്തുക്കളുടെ സാന്നിധ്യത്തിൽ വേദനയുടെ സന്ദേശം നാഡീവ്യൂഹം വഴി വൈദ്യുത തരംഗങ്ങളായി തലച്ചോറിലെത്തുകയും ചെയ്യുന്നു. ഇതോടെയാണ് നമുക്ക് ‘ശരീരം തല്ലിപ്പൊളിക്കുന്ന’ വേദനയും അസ്വസ്ഥതയും അനുഭവപ്പെടുന്നത്.
വേദനസംഹാരികൾ എങ്ങനെ പ്രവർത്തിക്കുന്നു?
നാം ഒരു വേദനസംഹാരി കഴിക്കുമ്പോൾ, അത് ഈ പ്രോസ്റ്റാഗ്ലാൻഡിൻ രാസവസ്തുക്കളുടെ ഉത്പാദനം തടയുന്നു. അതായത്, വേദനയുടെ സന്ദേശം മസ്തിഷ്കത്തിലേക്ക് എത്താതിരിക്കാനുള്ള ഒരു ‘റോഡ് ബ്ലോക്ക്’ ഇവ സൃഷ്ടിക്കുന്നു. സന്ദേശം എത്താതാകുന്നതോടെ നമുക്ക് ആശ്വാസം തോന്നുന്നു.
പ്രധാന അവയവങ്ങൾ ഭീഷണിയിൽ
സാധാരണയായി സുരക്ഷിതമെന്ന് കരുതുന്ന പാരസെറ്റമോൾ പോലും അമിതമായാൽ കരളിലെ കോശങ്ങളെ നശിപ്പിക്കും. കരളിൽ അടിഞ്ഞുകൂടുന്ന വിഷാംശങ്ങളെ പുറന്തള്ളാൻ സാധിക്കാതെ വരുമ്പോൾ അത് ലിവർ ഫെയിലിയറിലേക്ക് നയിക്കാം.
വേദനസംഹാരികളുടെ തുടർച്ചയായ ഉപയോഗം വൃക്കകളിലേക്കുള്ള രക്തയോട്ടം കുറയ്ക്കുന്നു. ഇത് കാലക്രമേണ വൃക്കകളുടെ പ്രവർത്തനം പൂർണ്ണമായും നിലയ്ക്കുന്ന ‘അനൽജെസിക് നെഫ്രോപ്പതി’ എന്ന അവസ്ഥയുണ്ടാക്കാം.
ഭക്ഷണത്തിന് മുൻപോ ഒഴിഞ്ഞ വയറ്റിലോ ഇവ കഴിക്കുന്നത് ആമാശയ ഭിത്തികളിൽ മുറിവുകളുണ്ടാക്കാനും (Ulcer), ആന്തരിക രക്തസ്രാവത്തിനും കാരണമാകും.
സുരക്ഷിതമായ ഉപയോഗത്തിന് ചില കാര്യങ്ങൾ ശ്രദ്ധിച്ചാൽ ഗുണകരമാകും.
സ്വയം ചികിത്സ ഒഴിവാക്കുക. ചെറിയ വേദനകൾക്ക് ചൂടുവെള്ളം പിടിക്കുന്നതോ വിശ്രമിക്കുന്നതോ പോലുള്ള പ്രകൃതിദത്ത മാർഗ്ഗങ്ങൾ ആദ്യം പരീക്ഷിക്കുക. മരുന്ന് വേണമെന്നുണ്ടെങ്കിൽ ഡോക്ടറുടെ നിർദ്ദേശം തേടുക.
ആമാശയത്തെ ബാധിക്കാതിരിക്കാൻ മിക്ക വേദനസംഹാരികളും ഭക്ഷണത്തിന് ശേഷം മാത്രം കഴിക്കുക.
ഒരു ദിവസം കഴിക്കാവുന്ന മരുന്നിന്റെ അളവിൽ കൂടുതൽ ഒരിക്കലും ഉപയോഗിക്കരുത്. പാരസെറ്റമോൾ ആണെങ്കിൽ പോലും കൂടുതൽ ശരീരത്തിലെത്തുന്നത് അപകടമാണ്.
ശരീരത്തിലെ വിഷാംശം പുറന്തള്ളാനും വൃക്കകളുടെ ആയാസം കുറയ്ക്കാനും ധാരാളം വെള്ളം കുടിക്കുക.
രോഗവിവരങ്ങൾ മറച്ചുവെക്കരുത്. കരൾ, വൃക്ക, ഹൃദയ രോഗങ്ങളോ അമിത രക്തസമ്മർദ്ദമോ ഉണ്ടെങ്കിൽ മരുന്ന് കുറിക്കുന്നതിന് മുൻപ് ഡോക്ടറെ അറിയിക്കുക.
”ശരീരം പുറപ്പെടുവിക്കുന്ന വേദനയുടെ സന്ദേശവാഹകരെ വഴിയിൽ വെച്ച് തടയുന്ന ട്രാഫിക് പൊലീസിനെപ്പോലെയാണ് വേദനസംഹാരികൾ പ്രവർത്തിക്കുന്നത്. എന്നാൽ ഈ തടയൽ വഴിയിൽ മറ്റ് അവശ്യ സേവനങ്ങൾക്കും തടസ്സമുണ്ടാക്കാം എന്നതാണ് ഇതിന്റെ മറുവശം.”
വേദനസംഹാരികൾ ആധുനിക വൈദ്യശാസ്ത്രത്തിന്റെ വലിയൊരു നേട്ടമാണ്. എന്നാൽ അവ നമ്മുടെ ‘അറിവില്ലായ്മ’ കൊണ്ട് ആപത്തായി മാറരുത്. കൃത്യമായ വൈദ്യനിർദ്ദേശത്തോടെ മാത്രം മരുന്നുകൾ ഉപയോഗിക്കുക, ആരോഗ്യകരമായ ജീവിതശൈലിയിലൂടെ വേദനകളെ പ്രതിരോധിക്കുക.
(വലിയശാല രാജു)
No Comment.