എഐ പഠനത്തിന് തടസ്സമാണെന്ന് കരുതുന്നവർക്ക് മുന്നിൽ വ്യത്യസ്തമായൊരു വിജയകഥയുമായി ഹരിയാനയിലെ 23കാരി ചഹ്വി സർദാന. ഹരിയാന സിവിൽ സർവീസ് പരീക്ഷയിൽ അഞ്ചാം റാങ്ക് സ്വന്തമാക്കിയ ചഹ്വി, പഠനത്തിനായി ചാറ്റ്ജിപിടിയെ ഫലപ്രദമായി ഉപയോഗിച്ചാണ് ഈ നേട്ടത്തിലേക്ക് എത്തിയത്. കോച്ചിങ് ക്ലാസുകളോ മോക്ക് ടെസ്റ്റുകളോ ആശ്രയിക്കാതെയായിരുന്നു തയ്യാറെടുപ്പ്.
ഹിസാറിലെ ഡോഗ്രാൻ മൊഹല്ല സ്വദേശിനിയായ ചഹ്വി 675ൽ 385 മാർക്ക് നേടിയാണ് അഞ്ചാം റാങ്കിലെത്തിയത്. പ്രിന്റിങ് പ്രസ് ഉടമയായ ചിരാഗ് സർദാനയുടെയും സുമൻ സർദാനയുടെയും മകളാണ്. കുടുംബത്തിലെ ആദ്യ സർക്കാർ ഉദ്യോഗസ്ഥയാകാനുള്ള അവസരമാണ് ഈ നേട്ടത്തിലൂടെ ചഹ്വിക്ക് ലഭിച്ചിരിക്കുന്നത്.
പട്യാലയിലെ കോളജിൽ നിന്ന് ബി.എ. എൽ.എൽ.ബി. പൂർത്തിയാക്കിയ ചഹ്വി, അഭിഭാഷകയാകുക എന്ന ലക്ഷ്യത്തിനൊപ്പം സിവിൽ സർവീസ് പരീക്ഷയ്ക്കും തയ്യാറെടുത്തു. ദിവസവും ഏകദേശം എട്ട് മണിക്കൂർ പഠനത്തിനായി മാറ്റിവെച്ചു. രാവിലെ ആറിന് പഠനം ആരംഭിക്കുകയും സ്വന്തം കൈകൊണ്ട് നോട്ടുകൾ തയ്യാറാക്കുകയും ചെയ്തു. പഠനത്തിൽ ശ്രദ്ധ കേന്ദ്രീകരിക്കുന്നതിനായി ഫെയ്സ്ബുക്ക്, ഇൻസ്റ്റഗ്രാം പോലുള്ള സോഷ്യൽ മീഡിയ പ്ലാറ്റ്ഫോമുകളിൽനിന്നും വിട്ടുനിന്നു.
വിഷയങ്ങൾ മനസ്സിലാക്കാനും സംശയങ്ങൾ തീർക്കാനും ചാറ്റ്ജിപിടി സഹായിച്ചു. കൃത്യമായ ആസൂത്രണവും സ്വയം പഠിക്കാനുള്ള കഴിവും എഐയുടെ ഫലപ്രദമായ ഉപയോഗവും ചേർന്നപ്പോൾ വിജയം കൈവന്നു. യുപിഎസ്‌സി, പഞ്ചാബ് സിവിൽ സർവീസ് പരീക്ഷകളുടെ ഫലങ്ങൾക്കായും ഇപ്പോൾ കാത്തിരിക്കുകയാണ് ചഹ്വി.
എഐയെ വെറുതെ സ്ക്രോൾ ചെയ്യാനല്ല, സ്വപ്നങ്ങൾ നേടാൻ ഉപയോഗിക്കാം!
No Comment.