സ്നേഹം എന്നാൽ കേവലം സന്തോഷങ്ങളിൽ മാത്രം പങ്കുചേരലല്ല, മറിച്ച് ജീവിതത്തിലെ ഏറ്റവും കറുത്ത നിമിഷങ്ങളിൽ കൈവിടാതെ കൂടെ നിൽക്കുക എന്നത് കൂടിയാണെന്ന് തെളിയിക്കുകയാണ് ഹെൻറി. പ്രണയവും അതിജീവനവും ഇഴചേർന്ന ഈ യഥാർത്ഥ ജീവിതക്കഥ ഹൃദയം തൊടുന്ന ഒന്നാണ്.
2018-ൽ ഒരു സ്ഥാപനത്തിൽ ഒന്നിച്ച് ജോലി ചെയ്യുമ്പോഴാണ് ഹെൻറിയും ഋതികയും തമ്മിൽ കണ്ടുമുട്ടുന്നത്. ആ സൗഹൃദം വൈകാതെ തന്നെ ആഴത്തിലുള്ള പ്രണയത്തിലേക്ക് വഴിമാറി. എന്നാൽ ഇരുവർക്കും മുന്നിൽ കുടുംബങ്ങളുടെ എതിർപ്പുകൾ വലിയൊരു പ്രതിബന്ധമായി നിന്നു. ആ വെല്ലുവിളികളെയെല്ലാം ധൈര്യപൂർവ്വം നേരിട്ട്, 2020 ഫെബ്രുവരിയിൽ അവർ ഒരുമിച്ച് ജീവിതത്തിലേക്ക് കടന്നു. സ്വന്തം കുടുംബത്തെ പോലും പിണക്കി തന്നെ വിശ്വസിച്ച് കൂടെപ്പോന്ന പ്രണയിനിയെ ഹെൻറി നെഞ്ചോടു ചേർത്തു പിടിച്ചു.
വളരെ സന്തോഷത്തോടെ മുന്നോട്ടുപോയ ആ ദാമ്പത്യജീവിതത്തിലേക്ക് അപ്രതീക്ഷിതമായി ഒരു ദുരന്തം കടന്നുവന്നു. ഋതികയ്ക്ക് ബ്രെയിൻ ഹെമറേജ് ബാധിച്ചു. ഉടൻ തന്നെ അടിയന്തര ശസ്ത്രക്രിയ നടത്തി ജീവൻ രക്ഷിക്കാൻ കഴിഞ്ഞെങ്കിലും, ആ രോഗാവസ്ഥ അവളുടെ ലോകം മാറ്റിമറിച്ചു.
സംസാരിക്കാനോ സ്വന്തം ശരീരം ചലിപ്പിക്കാനോ കഴിയാത്ത അവസ്ഥയിലായി അവൾ. കഴിഞ്ഞ നാല് വർഷത്തിനിടെ അഞ്ച് വലിയ ശസ്ത്രക്രിയകൾക്കാണ് ഋതിക വിധേയയായത്. ഓരോ തവണയും ഓപ്പറേഷൻ കഴിഞ്ഞ് മയക്കംവിട്ട് ഉണരുമ്പോൾ, പഴയതുപോലെ തന്നെ തന്റെ പേര് പറഞ്ഞ് അവൾ വിളിക്കുമെന്ന പ്രതീക്ഷയോടെ കാത്തിരിക്കുകയാണ് ഹെൻറി.
ഈ കടുത്ത പ്രതിസന്ധിയിൽ തളർന്നുപോയ ഋതികയുടെ അവസ്ഥ കണ്ട്, മറ്റൊരു വിവാഹം കഴിച്ച് പുതിയ ജീവിതം ആരംഭിക്കാൻ പലരും ഹെൻറിയോട് ഉപദേശിച്ചു. എന്നാൽ സ്നേഹിച്ചവളെ ഒറ്റയ്ക്കുവിട്ട് പിന്തിരിയാൻ ആ മനസ്സ് തയ്യാറായില്ല. “ആരോഗ്യത്തിലും രോഗത്തിലും ഒരുമിച്ചിരിക്കും” എന്ന് വിവാഹവേദിയിൽ നൽകിയ വാഗ്ദാനം അക്ഷരാർത്ഥത്തിൽ പാലിക്കുകയാണ് ഈ പ്രാണനാഥൻ.
തളർന്നുപോയ പങ്കാളിക്ക് തണലായി, സ്നേഹത്തിന്റെയും വിശ്വാസത്തിന്റെയും ഏറ്റവും മനോഹരമായ പ്രതീകമായി ഹെൻറി ഇന്നും നിലകൊള്ളുന്നു.
No Comment.