ലോകത്തിലെ മികച്ച വിദ്യാഭ്യാസ സ്ഥാപനങ്ങളുടെ പട്ടികയിൽ ഇന്ത്യയിൽ നിന്നുള്ള ഒന്നുപോലുമില്ലെന്ന് രാഷ്ട്രപതി ദ്രൗപതി മുർമു ലോകത്തിലെ ഏറ്റവും പഴക്കമേറിയ വിജ്ഞാന പാരമ്പര്യമുള്ള ഒരു രാജ്യമായ ഇന്ത്യയിൽ നിന്നുള്ള ഒരു വിദ്യാഭ്യാസ സ്ഥാപനവും ഈ പട്ടികയിൽ ഇല്ലെന്നുള്ളത് ഗൗരവകരമായി ചിന്തിക്കേണ്ടതുണ്ടെന്നും ദ്രൗപതി മുർമു ഊന്നിപ്പറഞ്ഞു.
ഐഐടി ഖരഗ്പൂരിന്റെ 69-ാമത് കോൺവൊക്കേഷനിൽ സംസാരിക്കവെയാണ് പ്രസിഡന്റ് മുർമു ഇക്കാര്യം പറഞ്ഞത്. “നമ്മൾ അതിനെക്കുറിച്ച് ചിന്തിക്കേണ്ടതുണ്ട്. മികച്ച വിദ്യാഭ്യാസത്തേക്കാൾ പ്രധാനം റാങ്കിംഗിനായുള്ള ഓട്ടമല്ല. എന്നാൽ മികച്ച റാങ്കിംഗ് (good ranking) ലോകമെമ്പാടുമുള്ള വിദ്യാർത്ഥികളെയും മികച്ച അധ്യാപകരെയും ആകർഷിക്കുക മാത്രമല്ല, രാജ്യത്തിന്റെ പ്രശസ്തി വർദ്ധിപ്പിക്കുകയും ചെയ്യുന്നു, ”അവർ പറഞ്ഞു. ഖരഗ്പൂർ ഐഐടിയോട് (IIT Kharagpur) ഈ ദിശയിൽ പ്രവർത്തിക്കാനും പ്രസിഡന്റ് മുർമു ആവശ്യപ്പെട്ടു.
“ഐഐടി ഖരഗ്പൂർ പോലുള്ള സ്ഥാപനങ്ങൾ നവീകരണത്തിലൂടെയും സാങ്കേതികവിദ്യയിലൂടെയും ഒരു പ്രധാന പങ്ക് വഹിക്കേണ്ടതുണ്ട്. സാങ്കേതികവിദ്യ വികസിപ്പിക്കുന്നതിനും അത് നടപ്പിലാക്കുന്നതിനും അവർ വിപ്ലവകരമായ ശ്രമങ്ങൾ നടത്തേണ്ടതുണ്ട്,” അവർ കൂട്ടിച്ചേർത്തു. അന്താരാഷ്ട്രവൽക്കരണവും ആഗോള സഹകരണവും എന്ന ഗവൺമെന്റിന്റെ നയവുമായി യോജിച്ച് നിൽക്കുന്നതിന് ഇൻസ്റ്റിറ്റ്യൂട്ടിനെ അവർ അഭിനന്ദിച്ചു. “ഐഐടി ഖരഗ്പൂർ മറ്റ് ആഗോള സ്ഥാപനങ്ങളുമായി സഖ്യത്തിലും സഹകരണത്തിലും പ്രവർത്തിക്കുന്നു. ഈ നടപടി അന്താരാഷ്ട്ര തലത്തിൽ ഐഐടി ഖരഗ്പൂർ സ്ഥാപിക്കാൻ സഹായിക്കുമെന്ന് മാത്രമല്ല, ഇന്ത്യൻ വിദ്യാഭ്യാസ സമ്പ്രദായത്തിന് ആഗോള അംഗീകാരം നൽകുന്നതിനുള്ള വലിയ ചുവടുവെയ്പ്പ് കൂടിയാണ്, ”അവർ പറഞ്ഞു.
സാമൂഹ്യനീതിയും സമത്വവും പ്രോത്സാഹിപ്പിക്കുന്നതിൽ സാങ്കേതികവിദ്യയുടെ പ്രാധാന്യം എടുത്തുപറഞ്ഞ മുർമു സാങ്കേതികവിദ്യയിൽ എല്ലാവർക്കും അവകാശങ്ങൾ ഉണ്ടായിരിക്കണമെന്നും പറഞ്ഞു. “എല്ലാവർക്കും സാങ്കേതികവിദ്യയ്ക്കുള്ള അവകാശം ഉണ്ടായിരിക്കണമെന്ന് ഞങ്ങൾ വിശ്വസിക്കുന്നു. സാങ്കേതികവിദ്യയുടെ ഉപയോഗം സമൂഹത്തിലെ അസമത്വങ്ങൾ വർദ്ധിപ്പിക്കുന്നതിനുപകരം സാമൂഹ്യനീതിയും സമത്വവും പ്രോത്സാഹിപ്പിക്കുന്നതിന് ആയിരിക്കണമെന്നും ഞങ്ങൾ വിശ്വസിക്കുന്നു,” രാഷ്ട്രപതി പറഞ്ഞു.
No Comment.