സമ്പൂർണ്ണ വാരഫലം 2026 മെയ് 24 മുതൽ മെയ് 30 വരെ

മേടം രാശി (അശ്വതി, ഭരണി, കാർത്തിക ആദ്യ കാൽഭാഗം):

ഈ വാരം മേടരാശിക്കാർക്ക് ഗുണദോഷ സമ്മിശ്രമായിരിക്കും. വാത, പിത്ത, കഫ സംബന്ധമായ അസുഖങ്ങൾ ഉള്ളവർ ആരോഗ്യകാര്യത്തിൽ അതീവ ജാഗ്രത പുലർത്തേണ്ട സമയമാണ്. ആരോഗ്യക്കുറവും ശാരീരിക ക്ഷീണവും അനുഭവപ്പെട്ടേക്കാം; ഭക്ഷണക്രമത്തിൽ പ്രത്യേക ശ്രദ്ധ നൽകിയില്ലെങ്കിൽ ശാരീരിക അസ്വസ്ഥതകൾ വർദ്ധിക്കും. മാതൃസ്ഥാനത്തുള്ളവർക്ക് രോഗദുരിതങ്ങൾക്കോ തളർച്ചയ്ക്കോ സാധ്യതയുണ്ട്. എന്നാൽ വാരമധ്യത്തോടെ സ്ഥിതിഗതികൾ അനുകൂലമാകും. തൊഴിൽ വിജയം, ശത്രുക്കളുടെ മേൽ വിജയം, ദാമ്പത്യ ഐക്യം, വരുമാന വർദ്ധനവ് എന്നിവ നിങ്ങളെ തേടിയെത്തും.

ഇടവം രാശി (കാർത്തിക അവസാന മുക്കാൽ ഭാഗം, രോഹിണി, മകയിര്യം ആദ്യ പകുതിഭാഗം):

വാരത്തിന്റെ തുടക്കത്തിൽ മാനസികമായി ചില അസ്വസ്ഥതകൾ ഉണ്ടാകാൻ സാധ്യതയുണ്ട്. സാഹചര്യങ്ങൾ മൂലം കുടുംബത്തിൽ നിന്ന് മാറി നിൽക്കേണ്ട അവസ്ഥ ഉണ്ടായേക്കാം. വാഹനങ്ങൾ കൈകാര്യം ചെയ്യുമ്പോൾ അതീവ ജാഗ്രത പുലർത്തുക. വാരമധ്യത്തോടെ കഷ്ടതകൾ മാറി ശത്രുനാശം, തൊഴിൽ വിജയം, കീർത്തി, ഭക്ഷണസുഖം, വാഹനഭാഗ്യം എന്നിവ കൈവരും. ദമ്പതികൾക്ക് ഒരുമിച്ച് താമസിക്കാൻ തക്കവണ്ണം ഉദ്യോഗത്തിൽ അനുകൂലമായ സ്ഥലമാറ്റത്തിന് സാധ്യതയുണ്ട്. പുതിയ വരുമാന സ്രോതസ്സുകൾ കണ്ടെത്താൻ സാധിക്കും.

മിഥുനം രാശി (മകയിര്യം അവസാന പകുതിഭാഗം, തിരുവാതിര, പുണർതം ആദ്യ മുക്കാൽഭാഗം):

ഈ വാരം ഗുണവും ദോഷവും കലർന്ന ഫലങ്ങളായിരിക്കും നൽകുക. വാരത്തിന്റെ തുടക്കത്തിൽ ഏത് കാര്യത്തിലും വലിയ ധൈര്യത്തോടെ മുന്നിട്ടിറങ്ങാനും അതിൽ വിജയം കൈവരിക്കാനും സാധിക്കും. നിങ്ങളുടെ അസാമാന്യമായ ചിന്താശേഷി മറ്റുള്ളവരുടെ ആദരവ് പിടിച്ചുപറ്റാൻ സഹായിക്കും. കലാമേഖലയിൽ പ്രവർത്തിക്കുന്നവർക്ക് മികച്ച പുരോഗതി ലഭിക്കുന്ന സമയമാണിത്. എന്നാൽ വാരമധ്യത്തോടെ മാനസികമായും കുടുംബപരമായും ചില വെല്ലുവിളികളും തടസ്സങ്ങളും നേരിടേണ്ടി വരാം. വാരാന്ത്യത്തോടെ വീണ്ടും മനസ്സമാധാനവും ആരോഗ്യവും വീണ്ടെടുക്കാൻ സാധിക്കും.

കർക്കിടകം രാശി (പുണർതം അവസാന കാൽഭാഗം, പൂയം, ആയില്യം):

തൊഴിൽപരമായും കുടുംബപരമായും ചില അസ്വസ്ഥതകൾ നിറയാൻ സാധ്യതയുള്ള വാരമാണിത്. ദമ്പതികൾ തമ്മിൽ പരസ്പര കലഹങ്ങൾക്കോ അഭിപ്രായവ്യത്യാസങ്ങൾക്കോ ഇടയുണ്ട്. നേത്രരോഗങ്ങളോ ശിരോരോഗങ്ങളോ ഉള്ളവർ അതീവ ശ്രദ്ധ പുലർത്തുക; കൃത്യസമയത്ത് വൈദ്യസഹായം തേടുന്നത് രോഗത്തിന്റെ തീവ്രത കുറയ്ക്കാൻ സഹായിക്കും. ഈ പ്രതിസന്ധികൾക്കിടയിലും സഹോദരങ്ങൾ തമ്മിലുള്ള സ്നേഹവും ഐക്യവും വർദ്ധിക്കുകയും അവരുടെ സഹായം വലിയ ആശ്വാസമാകുകയും ചെയ്യും. വാരത്തിന്റെ അവസാനത്തോടെ ഏറ്റവും പ്രിയപ്പെട്ടവരുടെ ആരോഗ്യസ്ഥിതിയിൽ കനത്ത ആശങ്കകൾക്ക് സാധ്യത കാണുന്നു.

ചിങ്ങം രാശി (മകം, പൂരം, ഉത്രം ആദ്യ കാൽഭാഗം):

ദീർഘകാലമായി അസുഖങ്ങൾക്ക് ചികിത്സയിലായിരുന്നവർക്ക് രോഗമുക്തി ലഭിക്കുകയും ആരോഗ്യം വീണ്ടെടുക്കാൻ സാധിക്കുകയും ചെയ്യും. വിലപ്പെട്ട സമ്മാനങ്ങളോ ആഭരണങ്ങളോ കൈവരാൻ യോഗമുണ്ട്. ജോലിയിൽ താൽക്കാലിക ക്ലേശങ്ങൾ വർദ്ധിക്കുമെങ്കിലും മേലധികാരികളുടെ പ്രശംസ പിടിച്ചുപറ്റുന്ന രീതിയിൽ മികച്ച സേവനം കാഴ്ചവെക്കാൻ നിങ്ങൾക്ക് സാധിക്കും. പഴയ സുഹൃത്തുക്കളെ കണ്ടുമുട്ടാനും അവരോടൊപ്പം ഇഷ്ടഭക്ഷണം കഴിക്കാനും അവസരമുണ്ടാകും. സാമ്പത്തിക അസന്തുലിതാവസ്ഥകൾ മാറി ജീവിതത്തിൽ ഗുണകരമായ പുതിയ വഴിത്തിരിവുകൾ ഉണ്ടാകും. എങ്കിലും വാരാന്ത്യത്തിൽ കുടുംബത്തിൽ ചെറിയ തർക്കങ്ങൾ ഉടലെടുക്കാം.

കന്നി രാശി (ഉത്രം അവസാന മുക്കാൽഭാഗം, അത്തം, ചിത്തിര ആദ്യ പകുതിഭാഗം):

വാരത്തിന്റെ തുടക്കത്തിൽ സ്ത്രീകളുമായി ബന്ധപ്പെട്ട വിഷയങ്ങളിൽ അപവാദങ്ങൾ കേൾക്കാനോ മാനഹാനി നേരിടാനോ സാധ്യതയുള്ളതിനാൽ ജാഗ്രത പാലിക്കുക. അനാവശ്യ കൂട്ടുകെട്ടുകൾ വഴി തെറ്റായ പ്രവൃത്തികളിൽ ഏർപ്പെടാൻ സാധ്യതയുള്ളതിനാൽ സൗഹൃദങ്ങൾ സൂക്ഷിക്കണം. അമിതമായ ആഡംബര പ്രിയം വരവിനേക്കാൾ ചെലവ് വർദ്ധിപ്പിക്കുകയും ധനക്ലേശത്തിന് കാരണമാകുകയും ചെയ്യും. കുടുംബാംഗങ്ങൾ തമ്മിൽ കലഹങ്ങൾക്ക് സാധ്യതയുണ്ട്. എന്നാൽ വാരമധ്യത്തോടെ രോഗങ്ങൾ കുറയുകയും ശരീര ചൈതന്യം വർദ്ധിക്കുകയും ചെയ്യും. പുതിയ വരുമാന മാർഗ്ഗങ്ങളോ അനുയോജ്യമായ തൊഴിലോ ലഭിക്കും. സുഹൃത്തുക്കളോടൊപ്പം പ്രശസ്തമായ പുണ്യസ്ഥലങ്ങൾ സന്ദർശിക്കാൻ സാധിക്കും.

തുലാം രാശി (ചിത്തിര അവസാന പകുതിഭാഗം, ചോതി, വിശാഖം ആദ്യ മുക്കാൽഭാഗം):

ദാമ്പത്യ ഐക്യം, തൊഴിൽ വിജയം, സാമ്പത്തിക ലാഭം എന്നിവ ഈ വാരം പ്രതീക്ഷിക്കാം. നല്ല സുഹൃത്തുക്കളുടെ സഹായം ലഭ്യമാകും. വളരെക്കാലമായി കാണാതിരുന്ന ബന്ധുക്കളെ കണ്ടുമുട്ടാനും കുടുംബത്തിലെ പ്രധാനപ്പെട്ട മംഗളകർമ്മങ്ങളിൽ പങ്കെടുക്കാനും സാധിക്കും. എന്നാൽ വാരമധ്യത്തിൽ സ്ത്രീകളോട് ഇടപഴകുമ്പോൾ അതീവ ശ്രദ്ധ പുലർത്തുക; സാമ്പത്തികമായോ മാനസികമായോ ചില പ്രശ്നങ്ങളിൽ അകപ്പെടാൻ സാധ്യതയുണ്ട്. പ്രിയപ്പെട്ടവരുമായി അഭിപ്രായവ്യത്യാസങ്ങൾ ഉണ്ടായേക്കാം. വാരാന്ത്യത്തോടെ കുടുംബത്തിൽ സമാധാന അന്തരീക്ഷം കൈവരികയും ലോട്ടറി, നറുക്കെടുപ്പ് തുടങ്ങിയവയിലൂടെ അപ്രതീക്ഷിത ഭാഗ്യാനുഭവങ്ങൾ ഉണ്ടാകുകയും ചെയ്യും.

വൃശ്ചികം രാശി (വിശാഖം അവസാന കാൽഭാഗം, അനിഴം, തൃക്കേട്ട):

വളരെ പ്രിയപ്പെട്ട വ്യക്തികളെ കണ്ടുമുട്ടാനും അവരോടൊപ്പം ആഘോഷവേളകളിൽ സജീവമായി പങ്കെടുക്കാനും ഈ വാരം അവസരമുണ്ടാകും. കുടുംബത്തിൽ അഭിവൃദ്ധി, ദാമ്പത്യ ഐക്യം, ബന്ധുസമാഗമം എന്നിവ പ്രതീക്ഷിക്കാം. പുതിയ സൗഹൃദങ്ങൾ ഉണ്ടാകുമെങ്കിലും സ്ത്രീ സുഹൃത്തുക്കളുമായി ഇടപഴകുമ്പോൾ അതീവ ജാഗ്രത പുലർത്തുക; ചതി, വഞ്ചന, പണനഷ്ടം അല്ലെങ്കിൽ അപവാദം എന്നിവയ്ക്ക് സാധ്യത കാണുന്നു. അനാവശ്യ കൂട്ടുകെട്ടുകളിൽ നിന്ന് മാറി സഞ്ചരിക്കാൻ ശ്രദ്ധിക്കുക. ഔദ്യോഗിക രംഗത്ത് മേലധികാരികളിൽ നിന്ന് വലിയ പ്രശംസയോ പുരസ്കാരങ്ങളോ ലഭിക്കാൻ യോഗമുണ്ട്. തൊഴിൽ ക്ലേശങ്ങൾ കുറയുകയും പുതിയ പദവികൾ അലങ്കരിക്കാൻ സാധിക്കുകയും ചെയ്യും.

ധനു രാശി (മൂലം, പൂരാടം, ഉത്രാടം ആദ്യ കാൽഭാഗം):

വാരത്തിന്റെ തുടക്കത്തിൽ ശത്രുശല്യം വർദ്ധിക്കാനും അനാവശ്യമായ അപവാദങ്ങളോ അപമാനങ്ങളോ നേരിടേണ്ടി വരാനും സാധ്യതയുണ്ട്. കാര്യതടസ്സങ്ങളും അലച്ചിലും അനുഭവപ്പെടാം. അയൽക്കാരുമായോ പ്രിയപ്പെട്ടവരുമായോ തർക്കങ്ങൾ ഉണ്ടാകാൻ ഇടയുണ്ട്. മാനസികമായ ബുദ്ധിമുട്ടുകൾ ഉള്ളവർ കൃത്യസമയത്ത് മരുന്നുകൾ കഴിക്കാൻ ശ്രദ്ധിക്കുക. ജലവുമായി ബന്ധപ്പെട്ട അപകടസാധ്യതകൾ ഉള്ളതിനാൽ യാത്രാവേളകളിൽ ശ്രദ്ധ വേണം. എന്നാൽ വാരമധ്യത്തോടെ തൊഴിലിടങ്ങളിൽ വലിയ ഉയർച്ചയും പ്രശസ്തിയും ലഭിക്കും. സ്വന്തം പദ്ധതികൾ വിജയകരമായി നടപ്പിലാക്കാൻ സാധിക്കും. വായ്പകൾക്ക് (Loan) അപേക്ഷിച്ചവർക്ക് അനുമതി ലഭിക്കും. ബന്ധുജനസമാഗമം, ഭക്ഷണസുഖം, ദാമ്പത്യ ഐക്യം എന്നിവയും പ്രതീക്ഷിക്കാം.

മകരം രാശി (ഉത്രാടം അവസാന മുക്കാൽഭാഗം, തിരുവോണം, അവിട്ടം ആദ്യ പകുതിഭാഗം):

ഈ വാരം നിങ്ങൾക്ക് സമ്മിശ്ര ഫലങ്ങളായിരിക്കും നൽകുക. വാരത്തിന്റെ തുടക്കത്തിൽ സുഹൃത്തുക്കളുടെ സമയോചിതമായ ഇടപെടലുകൾ വഴി വലിയൊരു അപകീർത്തിയിൽ നിന്ന് നിങ്ങൾ രക്ഷപ്പെടും. മാനസികമായ വിഷാദാവസ്ഥകൾക്ക് അടിയന്തര വൈദ്യസഹായം തേടേണ്ടി വന്നേക്കാം. നിങ്ങൾ സഹായിച്ച ബന്ധുക്കൾ തന്നെ വിരോധികളായി മാറാൻ സാധ്യതയുള്ളതിനാൽ ശ്രദ്ധിക്കുക. മാതാവിന്റെ രോഗാവസ്ഥ വർദ്ധിക്കാൻ ഇടയുള്ളതിനാൽ കടുത്ത കരുതൽ വേണം. വാരമധ്യത്തോടെ പ്രതിസന്ധികൾ മാറി ശത്രുനാശം, ധനലാഭം, ദാമ്പത്യ ഐക്യം, വാഹനഭാഗ്യം എന്നിവയുണ്ടാകും. ദമ്പതികൾക്ക് ഒരുമിച്ച് താമസിക്കാൻ തക്കവണ്ണം ഉദ്യോഗത്തിൽ മാറ്റമുണ്ടാകും. വാരാന്ത്യത്തിൽ ബിസിനസ്സ് പുരോഗതി, പ്രമോഷൻ, വിവാഹ യോഗം എന്നിവ ജീവിതത്തിൽ സംഭവിക്കും.

കുംഭം രാശി (അവിട്ടം അവസാന പകുതിഭാഗം, ചതയം, പൂരൂരുട്ടാതി ആദ്യ മുക്കാൽഭാഗം):

കുംഭരാശിക്കാർ അതീവ ശ്രദ്ധ പുലർത്തേണ്ട കാലഘട്ടമാണിത്. കുടുംബത്തിൽ കടുത്ത അഭിപ്രായവ്യത്യാസങ്ങൾ രൂപപ്പെട്ടേക്കാം. മാതാപിതാക്കൾക്കോ ബന്ധുക്കൾക്കോ രോഗദുരിതങ്ങൾ വരാൻ സാധ്യതയുണ്ട്. യാത്രാക്ലേശം വർദ്ധിക്കുന്ന തരത്തിലുള്ള സ്ഥാനമാറ്റത്തിന് സാധ്യത കാണുന്നു. ജീവിതത്തിൽ വലിയ തിരിച്ചറിവുകളും വൈകാരികമായ നിരവധി മുഹൂർത്തങ്ങളും ഉണ്ടാകും. കുടുംബപരമായി കഠിനമായ തീരുമാനങ്ങൾ എടുക്കാൻ നിർബന്ധിതനാകും. ദമ്പതികൾ തമ്മിൽ പരസ്പര ധാരണയോടെ പിരിയാൻ തീരുമാനിക്കുന്ന സാഹചര്യങ്ങൾ വരെ ഉണ്ടായേക്കാം. തൊഴിലിടങ്ങളിൽ വിവാദങ്ങളിൽ പെടുന്നത് മേലധികാരികളുടെ അപ്രീതിക്ക് കാരണമാകും. എന്നാൽ വാരാന്ത്യത്തോടെ ശത്രുഹാനി, രോഗശാന്തി, കീർത്തി, ധനലാഭം എന്നിവയിലൂടെ ആശ്വാസം ലഭിക്കും.

മീനം രാശി (പൂരൂരുട്ടാതി അവസാന കാൽഭാഗം, ഉതൃട്ടാതി, രേവതി):

വാരത്തിന്റെ തുടക്കത്തിൽ ബന്ധുജന സമാഗമത്തിനും സത്സുഹൃത്തുക്കളെ കണ്ടുമുട്ടാനും അവരോടൊപ്പം സന്തോഷത്തോടെ സമയം ചെലവഴിക്കാനും അവസരം ലഭിക്കും. ഭക്ഷണസുഖം, യാത്രാസുഖം, തൊഴിൽ വിജയം, സാമ്പത്തിക പുരോഗതി എന്നിവ അനുഭവപ്പെടും. പുതിയ ആഭരണങ്ങളോ അലങ്കാര വസ്തുക്കളോ വാങ്ങാൻ സാധിക്കും. സമൂഹത്തിൽ കീർത്തിയും ദാമ്പത്യസുഖവും നിലനിൽക്കും. സർക്കാർ ജോലിയിൽ ഇരിക്കുന്നവർക്ക് അപ്രതീക്ഷിതമായി സ്ഥാനക്കയറ്റത്തോടെയുള്ള സ്ഥലംമാറ്റത്തിന് യോഗമുണ്ട്. എന്നാൽ വാരത്തിന്റെ അവസാനത്തോടെ സാമ്പത്തിക നഷ്ടങ്ങൾ വരാതെ അതീവ ജാഗ്രത പുലർത്തേണ്ടതുണ്ട്.