സോഷ്യൽ മീഡിയയുടെ കണ്ണുനിറയിക്കുകയാണ് മുംബൈയിൽ നിന്നുള്ള ഒരു വീഡിയോ. റോഡരികിലെ പാവപ്പെട്ട അമ്മയ്ക്കും കുഞ്ഞിനും ഒരു മാലാഖയെപ്പോലെ സഹായവുമായെത്തിയ പോലീസ് ഉദ്യോഗസ്ഥൻ ഇന്ന് ലക്ഷക്കണക്കിന് ആളുകളുടെ ഹൃദയം കീഴടക്കിയിരിക്കുകയാണ്. മുംബൈ പോലീസിലെ സുശീൽ ശിഖരെ എന്ന ഉദ്യോഗസ്ഥനാണ് ഈ നന്മയുടെ മുഖം.
ഡ്യൂട്ടി കഴിഞ്ഞ് വീട്ടിലേക്ക് മടങ്ങുമ്പോഴാണ് വഴിയരികിലെ ഒരു കാഴ്ച സുശീലിന്റെ ശ്രദ്ധയിൽപ്പെട്ടത്. നടപ്പാതയിലെ മരത്തിൽ ഒരു പഴയ തുണി കൊണ്ട് കെട്ടിയുണ്ടാക്കിയ താൽക്കാലിക തൊട്ടിലിൽ ഒരു കുഞ്ഞ് കിടക്കുന്നു. കുഞ്ഞ് നിർത്താതെ കരയുമ്പോൾ അത് മാറ്റാൻ കഴിയാതെ നിസ്സഹായയായി നിൽക്കുന്ന ഒരമ്മയെയും അദ്ദേഹം അവിടെ കണ്ടു. ആ കാഴ്ച അദ്ദേഹത്തിന്റെ മനസ്സിനെ വല്ലാതെ ഉലച്ചു.
നിസ്സഹായതയിൽ നിന്ന് പുഞ്ചിരിയിലേക്ക്:
വൈകാതെ തന്നെ അദ്ദേഹം ഒരു പുതിയ തൊട്ടിലുമായി ആ അമ്മയുടെ അടുത്തെത്തി. തുടക്കത്തിൽ, മരത്തിൽ കെട്ടിയിരുന്ന പഴയ തുണിത്തൊട്ടിൽ ഉദ്യോഗസ്ഥൻ മാറ്റുന്നത് കണ്ടപ്പോൾ തന്റെ ഏക ആശ്രയം നഷ്ടപ്പെട്ടോ എന്ന ഭയത്താൽ ആ അമ്മ വേദനയോടെ നോക്കിനിൽക്കുന്നത് വീഡിയോയിൽ കാണാം. എന്നാൽ നിമിഷങ്ങൾക്കുള്ളിൽ അദ്ദേഹം ഒരു പുതിയ തൊട്ടിൽ അവിടെ സ്ഥാപിക്കുകയും കുഞ്ഞിനെ അതിൽ കിടത്തുകയും ചെയ്തതോടെ ആ അമ്മയുടെ മുഖത്ത് നന്ദിയും സന്തോഷവും നിറഞ്ഞു.
ഇൻസ്റ്റാഗ്രാമിലൂടെ സുശീൽ പങ്കുവെച്ച ഈ വീഡിയോ ഇതിനോടകം 10 മില്ല്യണിലധികം ആളുകളാണ് കണ്ടത്. “യൂണിഫോമിനുള്ളിലെ നല്ലൊരു അച്ഛൻ” എന്നും, “ലോകത്തിന് ഇങ്ങനെയുള്ള മനുഷ്യരെയാണ് ആവശ്യം” എന്നും തുടങ്ങി ആയിരക്കണക്കിന് കമന്റുകളാണ് വീഡിയോയ്ക്ക് താഴെ വരുന്നത്.
”നന്മയെന്നത് വലിയ പ്രവർത്തികളിൽ മാത്രമല്ല, മറ്റൊരാളുടെ കണ്ണീരൊപ്പാൻ നാം കാട്ടുന്ന ചെറിയൊരു കരുതൽ കൂടിയാണ്. അധികാരത്തേക്കാൾ വലുതാണ് സഹാനുഭൂതിയെന്ന് ഈ ഉദ്യോഗസ്ഥൻ നമ്മെ ഓർമ്മിപ്പിക്കുന്നു.
മണിയൻപിള്ള രാജു പ്രതിയായ വാഹനാപകടം; വൈദ്യ പരിശോധന ഫലം നിര്‍ണായകം
No Comment.