ലോകകപ്പില്‍ പ്രീ-ക്വാർട്ടർ ഉറപ്പിക്കുന്ന ആദ്യ ടീമായി കാനഡ. റൗണ്ട് ഓഫ് 32 പോരാട്ടത്തില്‍ ദക്ഷിണാഫ്രിക്കയെ എതിരില്ലാത്ത ഒരു ഗോളിന് കീഴടക്കിയാണ് കാനഡ അവസാന 16ല്‍ ഇടംപിടിച്ചത്.ഇഞ്ചുറി ടൈമിന്റെ രണ്ടാം മിനിറ്റില്‍ സ്റ്റീഫൻ എസ്റ്റാക്വിയോ നേടിയ ഗോളാണ് മത്സരഫലം നിർണയിച്ചത്. ലോകകപ്പ് ചരിത്രത്തില്‍ ആദ്യമായാണ് കാനഡ പ്രീ-ക്വാർട്ടറിലെത്തുന്നത്.
ആരംഭം മുതല്‍ ഇരുടീമുകളും ആക്രമണ ഫുട്ബോളാണ് പുറത്തെടുത്തത്. ആറാം മിനിറ്റില്‍ ടെബോഹോ മോകോനയിലൂടെ ദക്ഷിണാഫ്രിക്ക ഗോളിനടുത്തെത്തിയെങ്കിലും ശ്രമം ലക്ഷ്യം കണ്ടില്ല. തൊട്ടുപിന്നാലെ സ്റ്റീഫൻ എസ്റ്റാക്വിയോയുടെ ദൂരഷോട്ടും ഗോള്‍ബാറിന് മുകളിലൂടെ പറന്നു. 17-ാം മിനിറ്റില്‍ കോർണറില്‍ നിന്ന് ജൊനാഥൻ ഡേവിഡ് നടത്തിയ ശ്രമവും ഫലമുണ്ടാക്കിയില്ല.
ആദ്യ പകുതിയുടെ അവസാനഘട്ടത്തില്‍ കാനഡ തുടർച്ചയായി സമ്മർദം ചെലുത്തി. കോർണറില്‍ നിന്നുണ്ടായ ഗോളെന്നുറച്ച അവസരം ഗോള്‍ലൈൻ സേവിലൂടെ ദക്ഷിണാഫ്രിക്കൻ പ്രതിരോധം രക്ഷപ്പെടുത്തി. പിന്നാലെ ഗോള്‍കീപ്പർ റോണ്‍വെൻ വില്ല്യംസും മികച്ച സേവുകളുമായി ടീമിനെ മത്സരത്തില്‍ നിലനിർത്തി. ഗോള്‍രഹിത സമനിലയിലായിരുന്നു ആദ്യ പകുതി അവസാനിച്ചത്.
രണ്ടാം പകുതിയിലും ആക്രമണത്തിന് കുറവുണ്ടായില്ല. 62-ാം മിനിറ്റില്‍ ഒസ്വിൻ അപ്പോലിസിന്റെ ശ്രമം പുറത്തേക്ക് പോയപ്പോള്‍, മറുവശത്ത് കാനഡയുടെ കൗണ്ടർ അറ്റാക്കുകള്‍ ദക്ഷിണാഫ്രിക്കൻ പ്രതിരോധത്തെ നിരന്തരം പരീക്ഷിച്ചു. 75-ാം മിനിറ്റില്‍ അല്‍ഫോണ്‍സോ ഡേവിസ് കളത്തിലെത്തിയതോടെ കാനഡയുടെ മുന്നേറ്റങ്ങള്‍ക്ക് കൂടുതല്‍ മൂർച്ച ലഭിച്ചു.
മത്സരം സമനിലയിലേക്ക് നീങ്ങുമെന്ന് കരുതിയ ഘട്ടത്തിലാണ് കാനഡ വിജയഗോള്‍ നേടിയത്. വലതുവിങ്ങില്‍ നിന്നെത്തിയ ക്രോസ് ദക്ഷിണാഫ്രിക്കൻ പ്രതിരോധം ക്ലിയർ ചെയ്തെങ്കിലും പന്ത് സ്വന്തമാക്കിയ സ്റ്റീഫൻ എസ്റ്റാക്വിയോ ശക്തമായ ഷോട്ടിലൂടെ വലകുലുക്കി. ശേഷിച്ച നിമിഷങ്ങളില്‍ തിരിച്ചടിക്കാൻ ദക്ഷിണാഫ്രിക്കയ്ക്ക് അവസരം ലഭിക്കാതെ വന്നതോടെ കാനഡ ചരിത്രവിജയവുമായി പ്രീ-ക്വാർട്ടറിലേക്ക് മുന്നേറി.
No Comment.