പാലക്കാട് മണ്ണാർക്കാട് തച്ചമ്പാറ സ്വദേശിയായ വിഷ്ണുവിനെ കാണാതായിട്ട് ഇന്ന് ഒരു മാസം പിന്നിട്ടിട്ടും ഇതുവരെ കണ്ടെത്താനായിട്ടില്ല. ഒരു സാധാരണ നിർധന കുടുംബത്തിന്റെ ഏക ആശ്രയവും അത്താണിയുമായിരുന്ന മകനെ കാത്ത് ഓരോ ദിവസവും പ്രതീക്ഷയോടെ കഴിയുകയാണ് വീട്ടുകാർ.
“എന്റെ മകനെ ജീവനോടെ തിരികെ കിട്ടിയാൽ മാത്രം മതി…” കണ്ണീരോടെ അമ്മ പറയുന്ന ഈ വാക്കുകൾ ആരുടെയും ഹൃദയം തകർക്കുന്നതാണ്. സന്തോഷത്തോടെ യാത്ര പോയ മകൻ ഇനി എവിടെയാണെന്ന് പോലും അറിയാതെ ഓരോ നിമിഷവും വേദനയോടെ തള്ളിനീക്കുകയാണ് കുടുംബം.
മകനെ കണ്ടെത്താനായി കുടുംബാംഗങ്ങളും നാട്ടുകാരും നേരിട്ട് കൊടൈക്കനാലിലെത്തി. യുവാവ് സഞ്ചരിച്ച സ്ഥലങ്ങളിലെല്ലാം അന്വേഷണം നടത്തി. ഹോട്ടൽ ജീവനക്കാരോടും സുഹൃത്തുക്കളോടും വിവരങ്ങൾ തേടി. പോസ്റ്ററുകൾ പതിച്ചു. സോഷ്യൽ മീഡിയയിലൂടെ വ്യാപകമായി വിവരം പങ്കുവെച്ചു. എന്നാൽ ഒരു സൂചന പോലും ഇതുവരെ ലഭിച്ചിട്ടില്ല.
സംഭവത്തിൽ തമിഴ്നാട് പോലീസിന്റെ അന്വേഷണം തൃപ്തികരമല്ലെന്നാണ് നാട്ടുകാരുടെ ആരോപണം. കേസ് രജിസ്റ്റർ ചെയ്തിട്ടുണ്ടെങ്കിലും കൂടുതൽ ശക്തമായ അന്വേഷണം നടക്കുന്നില്ലെന്നും നിർണായകമായ സിസിടിവി ദൃശ്യങ്ങൾ പരിശോധിക്കണമെന്നും സുഹൃത്തുക്കളെ വിശദമായി ചോദ്യം ചെയ്യണമെന്നും അവർ ആവശ്യപ്പെടുന്നു.
ഇതിനിടെ നാട്ടുകാർ ചേർന്ന് ആക്ഷൻ കൗൺസിലും രൂപീകരിച്ചു. ഒരു സാധാരണ കുടുംബത്തിന്റെ നിലവിളി അധികാരികൾ കേൾക്കണമെന്നും യുവാവിനെ കണ്ടെത്താൻ തമിഴ്നാട് പോലീസും കേരള പോലീസും സംയുക്തമായി അടിയന്തര അന്വേഷണം നടത്തണമെന്നും ആക്ഷൻ കൗൺസിൽ ആവശ്യപ്പെട്ടു.
ഒരു മാസം കഴിഞ്ഞിട്ടും പ്രതീക്ഷ കൈവിടാതെ മകനെ കാത്തിരിക്കുന്ന ആ അമ്മയുടെ കണ്ണീരിന് ഉത്തരമാകാൻ ഇനി വൈകാൻ പാടില്ല. യുവാവിനെ കുറിച്ച് എന്തെങ്കിലും വിവരം ലഭിക്കുന്നവർ അടുത്തുള്ള പോലീസ് സ്റ്റേഷനിലോ കുടുംബാംഗങ്ങളെയോ ഉടൻ അറിയിക്കണമെന്ന് നാട്ടുകാർ അഭ്യർഥിച്ചു.
ഒരു സാധാരണ കുടുംബത്തിന്റെ ഏക പ്രതീക്ഷയായ ഈ യുവാവിനെ എത്രയും വേഗം കണ്ടെത്താൻ ബന്ധപ്പെട്ട അധികൃതർ അടിയന്തര നടപടി സ്വീകരിക്കണമെന്നാണ് നാടിന്റെ ഒരേയൊരു ആവശ്യം.
No Comment.