പുസ്തക പരിജയം(മൗനം പറഞ്ഞതും ഞാൻ കുറിച്ചതും)

മൗനത്തിൽ ഒളിച്ചിരിക്കുന്ന പ്രണയം
പറയാതെ സൂക്ഷിച്ച പ്രണയത്തിന്റെ ആഴം; ‘മൗനം പറഞ്ഞതും ഞാൻ കുറിച്ചതും‘

കൊല്ലം: പ്രണയം ചിലപ്പോൾ വാക്കുകളേക്കാൾ കൂടുതൽ ശക്തമായി മൗനത്തിലൂടെ സംസാരിക്കും. പറയാതെ പോയ സ്നേഹവും പൂർത്തിയാകാത്ത ബന്ധങ്ങളും അകന്നുപോയ മനുഷ്യരുടെ ഓർമ്മകളും മനസ്സിൽ ബാക്കിവയ്ക്കുന്ന ശൂന്യതയും കവിതയിലൂടെ രേഖപ്പെടുത്തുകയാണ് നിഥിൻകുമാർ ജെയുടെ ‘മൗനം പറഞ്ഞതും ഞാൻ കുറിച്ചതും’. ബുക്ക് നെസ്റ്റ് പ്രസിദ്ധീകരിച്ച പുസ്തകത്തിൽ 34 കവിതകളാണ് ഉൾപ്പെടുത്തിയിരിക്കുന്നത്. പ്രണയവും വിരഹവും മാത്രമല്ല, ഏകാന്തത, ഒറ്റപ്പെടൽ, അതിജീവനം, സ്വപ്നം, വെറുപ്പ്, പക, കുടുംബബന്ധങ്ങൾ തുടങ്ങിയ ജീവിതത്തിന്റെ വിവിധ ഭാവങ്ങളും കവിതകളിൽ കടന്നുവരുന്നു.

പ്രണയം സ്വന്തമാക്കുന്നതിന്റെ സന്തോഷം മാത്രമല്ല, നഷ്ടപ്പെടുന്നതിന്റെ വേദനയും കാത്തിരിപ്പിന്റെ അസ്വസ്ഥതയും ബന്ധങ്ങൾക്കിടയിൽ രൂപപ്പെടുന്ന മൗനവും ഈ കാവ്യലോകത്തിന്റെ ഭാഗമാണ്. ചിലപ്പോൾ ഒരു ബന്ധം അവസാനിച്ചാലും അതിന്റെ ഓർമ്മ മനുഷ്യന്റെ ഉള്ളിൽ തുടരുന്നു. ആ ഓർമ്മകൾക്ക് വാക്കുകൾ നൽകുകയാണ് കവി. ജീവിതത്തിലെ അർത്ഥമില്ലാത്തതായി തോന്നിയ ചില നിമിഷങ്ങൾ പിന്നീട് ഏറ്റവും അർത്ഥമുള്ള ഓർമ്മകളായി മാറുമെന്ന് പുസ്തകം ഓർമിപ്പിക്കുന്നു. അതുകൊണ്ടുതന്നെ വിരഹം പോലും ജീവിതത്തെ തിരിച്ചറിയാനുള്ള ഒരു അനുഭവമായി മാറുന്നു. പറയാൻ കഴിയാതെ പോയ വാക്കുകൾ, പ്രകടിപ്പിക്കാതെ പോയ വികാരങ്ങൾ, തിരിച്ചുകിട്ടാത്ത ബന്ധങ്ങൾ—ഇവയെല്ലാം മൗനത്തിന്റെ ഭാഷയിൽ കവിതയായി മാറുന്നു. ഒരു വ്യക്തിയുടെ മാനസിക അനുഭവങ്ങളിലൂടെ ഒരു സമൂഹത്തിന്റെ ബന്ധങ്ങളെയും ജീവിതാവസ്ഥകളെയും വായിക്കാൻ ശ്രമിക്കുന്ന കൃതിയാണിത്.

1996-ൽ കൊല്ലം ജില്ലയിലെ ചവറയിൽ ജനിച്ച നിഥിൻകുമാർ ജെ കഥ, നോവൽ, ചിത്രകഥ, കവിത തുടങ്ങിയ മേഖലകളിൽ എഴുതുന്നു. നിഴൽ സാഹിത്യവേദിയുടെ ഭാഗമായി നിരവധി സാഹിത്യസമാഹാരങ്ങൾ എഡിറ്റ് ചെയ്ത് പ്രസിദ്ധീകരിച്ചിട്ടുണ്ട്. ‘ഒറ്റ’, ‘മൗനം പറഞ്ഞതും ഞാൻ കുറിച്ചതും’, ‘ആകാശത്തിനു താഴെ ചുവന്ന നനവുള്ള മണ്ണ്’ എന്നിവയാണ് അദ്ദേഹത്തിന്റെ കവിതാസമാഹാരങ്ങൾ. ഒരിക്കൽ പ്രണയിച്ചവർക്കും, നഷ്ടപ്പെട്ടവർക്കും, പറയാതെ പോയൊരു വാക്ക് ഇന്നും മനസ്സിൽ സൂക്ഷിക്കുന്നവർക്കും ഈ പുസ്തകം സ്വന്തം കഥയുടെ ഒരു ഭാഗം പോലെ തോന്നിയേക്കാം.

ബന്ധപ്പെടാൻ: 7994766150
ഇമെയിൽ: nithinjana@gmail.com