വിവാഹത്തിന് പിന്നാലെ മകൻ മരിച്ചു , മരുമകൾക്ക് വിവാഹം നടത്തികൊടുത്ത് അമ്മായിയമ്മ , അഭിനന്ദനങ്ങൾ കൊണ്ട് മൂടി സോഷ്യൽ ലോകം

വിവാഹം കഴിഞ്ഞ് ഒരു വര്ഷം ആവുന്നതിന് മുൻപ് മകൻ മരിച്ചു. മരുമകൾക്ക് മറ്റൊരു വിവാഹം നടത്തികൊടുത്ത് മറ്റുള്ളവർക്കും മാതൃകയായിരിക്കുകയാണ് പ്രതിഭയെന്ന അമ്മായിയമ്മ. ഭുവനേശ്വറിലാണ് സംഭവം നടന്നത്

“മകന്റെ ഭാര്യയല്ലേ അവൾ , അവളിനി അവന്റെ വിധവയായി ജീവിതം ജീവിച്ചു തീർക്കട്ടെ ,വിധി അതായിപ്പോയില്ലേ” എന്ന് ബന്ധുക്കൾ വിധിയെഴുതിയപ്പോൾ ആ വിധി മാറ്റിയെഴുതിയത് അമ്മായിയമ്മ പ്രതിഭയുടെ ഉറച്ച തീരുമാനമായിരുന്നു. “എന്റെ മകനോ എന്നെ വിട്ട് പോയി , ഇനി ഇവളും ജീവിതം വിധിക്ക് വിട്ട് കൊടുത്തു ജീവിക്കണോ ? അത് ഞാൻ സമ്മതിക്കില്ല , അവൾ ജീവിതം ജീവിച്ചു തുടങ്ങിയതേ ഉള്ളു അവൾക്ക് ജീവിതം ഇനിയും ബാക്കിയുണ്ട് ” എന്നുള്ള അമ്മായിയമ്മ പ്രതിഭയുടെ തീരുമാനത്തിന് മനസില്ല മനസ്സോടെ സമ്മതം മൂളുകയല്ലാതെ ബന്ധുക്കൾക്ക് മറ്റു വഴികളൊന്നും ഇല്ലായിരുന്നു .

അങ്ങനെ മരുമകൾക്ക് ആ അമ്മായിയമ്മ വിവാഹം നടത്തികൊടുക്കുകയും ചെയ്തു . ഭുവനേശ്വറിൽ നിന്നാണ് ഏവരുടെയും ഹൃദയം തൊടുന്ന വാർത്ത പുറത്തുവന്നിരിക്കുന്നത് . ആകുല ജില്ലയിലെ താൽച്ചർ ക്ഷേത്രത്തിൽ വെച്ചാണ് മരുമകളായ ലില്ലിയുടെ വിവാഹം പ്രതിഭ നടത്തിയത് . ഞാൻ ജീവന് തുല്യം സ്നേഹിച്ച എന്റെ മകനെ എനിക്ക് നഷ്ടമായി , അവനെയോർത്ത് മരുമകൾ ജീവിതം കളയരുത് അതുകൊണ്ടാണ് ഞാൻ ഇങ്ങനെയൊരു തീരുമാനം എടുത്തത് എന്നായിരുന്നു പ്രതിഭയുടെ പ്രതികരണം. എന്തായാലും വാർത്ത പുറത്തുവന്നതിന് പിന്നാലെ നിരവധി ആളുകളാണ് അമ്മയുടെ പ്രതിഭയുടെ പ്രവൃത്തിക്ക് അഭിനന്ദനങ്ങൾ നേർന്ന് രംഗത്ത് വരുന്നത്