അമ്മേ, ഞാൻ കുറച്ചു പണം എടുക്കാൻ പുറത്തേക്കിറങ്ങുവാ…”; രാത്രിയിൽ വിളിച്ച ആ അവസാന വീഡിയോ കോൾ ഒടുവിൽ കരിച്ചുകളഞ്ഞത് ഒരു കുടുംബത്തിന്റെ മുഴുവൻ സ്വപ്നങ്ങളെയും;

ജപ്പാനിൽ ബുള്ളറ്റ് ട്രെയിൻ തട്ടി മരിച്ച മലയാളി പെൺകുട്ടി ദേവികയുടെ ചിതാഭസ്മം കണ്ണീരിൽ കുതിർന്നു ജന്മനാട്ടിൽ!

അമ്മയുടെ മുഖം കണ്ട്, വിശേഷങ്ങൾ പങ്കുവെച്ച് ഫോൺ വെച്ചതിന് ശേഷമുള്ള ആ തിരിഞ്ഞുനടപ്പിൽ പൊലിഞ്ഞുപോയത് ഇരുപത്തിരണ്ടുകാരിയുടെ വലിയൊരു ജീവിതസ്വപ്നമായിരുന്നു.

ജപ്പാനിലെ ഗിഫു പ്രവിശ്യയിൽ ബുള്ളറ്റ് ട്രെയിൻ തട്ടി ദാരുണമായി മരിച്ച കണ്ണൂർ ഇരിട്ടി പടിയൂർ സ്വദേശി വി. ദേവികയുടെ ചിതാഭസ്മം ഒടുവിൽ ജന്മനാട്ടിലെത്തിച്ച് കുടുംബത്തിന് കൈമാറിയിരിക്കുന്നു.

അഡ്വ. സജീവ് ജോസഫ് എം.എൽ.എയുടെ നേതൃത്വത്തിൽ പടിയൂരിലെ വീട്ടിലെത്തിച്ച ആ ചിതാഭസ്മം ഏറ്റുവാങ്ങിയ മാതാപിതാക്കളുടെയും നാടിന്റെയും നിലവിളി ഏവരുടെയും കരളലിയിക്കുന്നതായിരുന്നു.

അവസാനമായി കേട്ട ആ ശബ്ദം…

കഴിഞ്ഞ സെപ്റ്റംബർ രണ്ടിന് രാത്രി പത്തരയോടെയായിരുന്നു ആ ദുരന്തം നടക്കുന്നത്.

എന്നാൽ അന്ന് രാത്രി എട്ടരയോടെ നാട്ടിലുള്ള അമ്മയെ വീഡിയോ കോൾ ചെയ്ത് സംസാരിച്ചിരുന്നു ദേവിക. “അമ്മേ, പണം പിൻവലിക്കാൻ ഞാൻ പുറത്തുപോവുകയാണ്…” എന്ന് ചിരിച്ചുകൊണ്ട് പറഞ്ഞ ആ പെൺകുട്ടിയുടെ ശബ്ദം മാത്രമാണ് ഇന്ന് ആ അമ്മയുടെ നെഞ്ചിൽ ബാക്കിയുള്ളത്.

പിന്നീട് മകളിൽ നിന്ന് യാതൊരു വിവരവുമില്ലാതായതോടെ ബന്ധുക്കൾ മുഖ്യമന്ത്രി ഉൾപ്പെടെയുള്ളവർക്ക് പരാതി നൽകി കാത്തിരുന്ന ദിവസങ്ങൾക്കൊടുവിലാണ് റെയിൽവേ ട്രാക്കിന് സമീപത്തുനിന്നും ലഭിച്ച തിരിച്ചറിയൽ കാർഡിന്റെ അടിസ്ഥാനത്തിൽ ആ ദാരുണ വാർത്ത തേടിയെത്തിയത്.

മറുവശത്തിരുന്ന് കണ്ണീരോടെ കണ്ട ആ ചിത…

പ്ലസ്ടുവിനും ലാബ് ടെക്നീഷ്യൻ കോഴ്സിനും ശേഷം കാസർകോട് നീലേശ്വരത്ത് എട്ടുമാസം നീണ്ട ജാപ്പനീസ് ഭാഷാ കോഴ്സ് പഠിച്ചാണ് ദേവിക ജപ്പാനിലേക്ക് പറന്നത്.

മൂന്നുവർഷത്തെ കരാറിൽ ഇഗോളോ ചോവൻ സോഷ്യൽ വെൽഫെയർ കോർപ്പറേഷനിൽ നഴ്സിങ് അസിസ്റ്റന്റായി ജോലിയിൽ പ്രവേശിച്ച് വെറും ആറുമാസം മാത്രേയാകുന്നുണ്ടായിരുന്നുള്ളൂ.

പ്രകാശന്റെയും ബിനിയുടെയും മൂത്ത മകളായ ആ കൊച്ചുകുട്ടി വിദേശത്ത് വെച്ച് പൊലിഞ്ഞുപോയപ്പോൾ മൃതദേഹം നാട്ടിലെത്തിക്കാനുള്ള പ്രായോഗിക ബുദ്ധിമുട്ടുകൾ കാരണം ജപ്പാനിൽ വെച്ചുതന്നെയായിരുന്നു സംസ്കാര ചടങ്ങുകൾ നടത്തിയത്.

വേൾഡ് മലയാളി ഫെഡറേഷൻ, നിഫോൺ കേരളി തുടങ്ങിയ സംഘടനകളുടെ നേതൃത്വത്തിൽ ജപ്പാനിൽ വെച്ച് ഹിന്ദു ആചാരപ്രകാരമാണ് സംസ്കാരം നടന്നത്.

നാട്ടിലുള്ള കുടുംബാംഗങ്ങൾക്ക് കാണാനായി ചടങ്ങുകൾ തത്സമയം സ്ട്രീമിംഗ് ചെയ്തിരുന്നു.

ലോകത്തിന്റെ മറുവശത്തിരുന്ന്, സ്ക്രീനിലേക്ക് നോക്കി തങ്ങളുടെ മകളുടെ ചിതയിലേക്ക് കണ്ണീരോടെ നോക്കിനിൽക്കേണ്ടിവന്ന ആ മാതാപിതാക്കളുടെ വേദന ഏതൊരു മനുഷ്യന്റെയും കരളലിയിക്കുന്നതാണ്.

ഒരു പിടി ചാരമായി മടക്കം…

കേന്ദ്ര വിദേശകാര്യ മന്ത്രാലയത്തിന്റെയും ഇന്ത്യൻ എംബസിയുടെയും ജപ്പാനിലെ മലയാളി സംഘടനകളുടെയും നോർക്ക റൂട്ട്സിന്റെയും സഹകരണത്തോടെയാണ് ഒടുവിൽ ആ മകളുടെ ചിതാഭസ്മം തിരുവനന്തപുരം വഴി ട്രെയിൻ മാർഗം കണ്ണൂരിലെത്തിച്ചത്.

പടിയൂർ നെടിയോടിയിലെ വീട്ടിലെത്തിച്ച ചിതാഭസ്മം അച്ഛൻ പ്രകാശൻ എം.എൽ.എ സജീവ് ജോസഫിൽ നിന്ന് ഏറ്റുവാങ്ങുമ്പോൾ അവിടെ കൂടിയ നാടൊന്നാകെ കരയുകയായിരുന്നു.

സ്വപ്നങ്ങളുടെ വലിയ ലോകം തേടിപ്പോയ മകൾ ഒടുവിൽ ഒരു പിടി ചാരമായി സ്വന്തം വീട്ടിലേക്ക് തിരിച്ചെത്തിയപ്പോൾ, ആ മാതാപിതാക്കളുടെ നെഞ്ചിലെ തീ അണയുന്നതെങ്ങനെയാണ്?