താമരശ്ശേരി ചുരത്തില് വിനോദ സഞ്ചാരിയുടെ വിലപിടിപ്പുള്ള ഐ-ഫോണ് കൈക്കലാക്കി കുരങ്ങന് കൊക്കയിലേക്ക് എറിഞ്ഞു.
ഫോണ് കല്പ്പറ്റ അഗ്നിശമന സേന വിനോദ സഞ്ചാരിക്ക് വീണ്ടെടുത്ത് നല്കി. കോഴിക്കോട് പെരുമണ്ണ സ്വദേശി പിലാത്തോട്ടത്തില് ജാസിം എന്നയാളുടെ 75,000 രൂപ വില വരുന്ന ഐ ഫോണ് 12 പ്രോ ആണ് കുരങ്ങ് എടുത്ത് കൊണ്ടുപോയി ചുരത്തില് നിന്ന് താഴേക്ക് എറിഞ്ഞത്. കോഴിക്കോട് നിന്ന് വയനാട്ടിലെ വിവിധ സ്ഥലങ്ങള് കാണാന് ജീപ്പിലെത്തിയ സംഘം വ്യൂ പോയിന്റില് കാഴ്ചകള് കാണുകയായിരുന്നു. ഇതിനിടെയെത്തിയ വാനരസംഘത്തില് ഒന്നാണ് പണിപ്പറ്റിച്ചത്
ജീപ്പില്നിന്ന് ഫോണ് എടുത്ത കുരങ്ങന് ചുരം വ്യൂ പോയിന്റില് നിന്ന് തന്നെ താഴേക്ക് എറിയുകയായിരുന്നു. ഫോണ് എടുക്കാന് ഒരു മാര്ഗവും ഇല്ലാതെ വന്നതോടെയാണ് ജാസിം ഫയര്ഫോഴ്സിനെ വിളിക്കുന്നത്. രാവിലെ ഒമ്പതോടെയാണ് വ്യൂ പോയിന്റില് നിന്ന് വിളിയെത്തിയതെന്ന് കല്പ്പറ്റ ഫയര്ഫോഴ്സ് അറിയിച്ചു. ഉടന് പ്രദേശത്ത് ഫയര്ഫോഴ്സ് സംഘം എത്തി. ഫയര്മാനായ എം. ജിതിന് കുമാര് റോപ്പ് കെട്ടി താഴെയിറങ്ങി ഫോണ് വീണ്ടെടുത്ത് ഉടമയ്ക്ക് തിരികെ നല്കി. നേരിയ ചാറ്റല് മഴയും കോടയും ഈ സമയം ചുരത്തിലുണ്ടായിരുന്നു. വാട്ടര്പ്രൂഫ് ആയതിനാലും ഫോണ് ഓഫാതിരുന്നതും കാരണം ഇത് വീണ്ടെടുക്കാനായി.
മുപ്പത് മിനിറ്റ് നീണ്ട പരിശ്രമത്തിന് ഒടുവിലാണ് താഴെയിറങ്ങി ഫോണ് എടുക്കാനായത്. ഫോണിന് പ്രശ്നങ്ങള് ഒന്നും ഇല്ലായിരുന്നുവെന്നും ഫയര്ഫോഴ്സ് അറിയിച്ചു. അസിസ്റ്റന്റ് സ്റ്റേഷന് ഓഫീസര് പിഎം അനില്, ഫയര്മാന്മാരായ എന്എസ് അനൂപ്, എംപി ധനീഷ്കുമാര്, ബി ഷറഫുദീന്, ഹോം ഗാര്ഡ് കെബി പ്രജീഷ് എന്നിവരാണ് സംഘത്തിലുണ്ടായിരുന്നത്.
No Comment.